Республика күнінде Астананың барлық ауданында концерт өтті

Еліміздегі ұлттық мереке – Республика күнінің құрметіне бүгін елорданың әр тұсында қала тұрғындары мен қонақтарына мерекелік көңіл күй сыйлау мақсатында концерттер ұйымдастырылды. Қаланың бес ауданында шығармашылық ұжымдардың қатысуымен үлкен концерттік іс-шаралар өтті.

Атап айтсақ, Алматы ауданындағы «Интернациональный» тұрғын алабында танымал қазақстандық композицияларды орындаған «Жастар» театрының әртістері сахна сәнін кіргізді.

Байқоңыр ауданы «Өндіріс» тұрғын алабындағы алаңда Қуыршақ театрының концерттік бағдарламасы ұйымдастырылса, Есіл ауданындағы «Бәйтерек» монументінің алдындағы алаңда Еркеғали Рахмадиев атындағы Мемлекеттік академиялық филармония мен елордалық цирк әртістері барын салып өнер көрсетті.

Сарыарқа ауданындағы қалалық алаңда «Жошы» этно-фольклорлық ансамблі өнерін ортаға салып, халық аспаптарының сүйемелдеуімен қазақ фольклорының үздік үлгілерін ұсынды.

Нұра ауданындағы Орталық саябақ аумағында «Наз» мемлекеттік би театрының әртістері көрермен алдында заманауи және дәстүрлі би нөмірлерінің бағдарламасымен өнер көрсетті.

Естеріңізге сала кетсек, Республика күніне орай Астанада 100-ден астам мәдени-бұқаралық, спорттық және әлеуметтік іс-шаралар өткізілді.

Жасұлан Бақытбекұлы