ТҮРКІСТАН: БАСКЕТБОЛДАН ЖАСӨСПІРІМДЕР АРАСЫНДА ОБЛЫС ЧЕМПИОНАТЫ МӘРЕСІНЕ ЖЕТТІ 

Мақтаарал ауданы, Мырзакент елдімекенінде баскетболдан Қазақстан чемпионатына іріктеу сайысы өтті. Жарыс Түркістан облысының дене шынықтыру және спорт басқармасы мен Мақтарал аудандық мәдениет және тілдерді дамыту басқармасы бірлесіп ұйымдастыруымен қолға алынған. 

Бес күнге созылған облыстық чемпионатқа 13 команда қатысып, өзара бақ сынасты. Алаңда өзінің жан-жақты шеберлігін көрсеткен жеткіншектер облыс құрамасына алынып, республикалық додада өңір намысын қорғамақ. 
Байрақты бәсекенің қорытындысы бойынша І орынға Мақтаарал ауданының спортшылары ие болды. Жүлделі ІІ орынға Төле би ауданының құрамасы табан тіреп, ІІІ орынды Созақ ауданынан келген баскетболшылар иеленді. 
Топ жарған командалар мен үздік деп танылған спортшылар арнайы медальдар мен алғыс хаттар және бағалы сыйлықтармен марапатталды. Айта кетсек, бұл Алматы қаласында 1-8 наурыз аралығында өтетін Қазақстан чемпионатына іріктеуға арналған жарыс. Ең үздіктер ел чемпионатында бақ сынайды. 

Түркістан облысының Өңірлік коммуникациялар қызметі