Түркиядағы толқу толастамай тұр
Ыстамбұл қаласы әкімі Экрем Имамоғлының тұтқындалуынан кейін басталған халықтық толқулар әлі толастамай тұр. 30 наурыз күні Республикалық халық партиясы Ыстамбұлдағы Мальтепе алаңына «Имамоғлына бостандық» митингісін ұйымдастырды. Жиналған жұрт Түркия байрағын жоғары көтеріп тұрып, «жемқорлық жасады, террорлық ұйымдармен байланыс орнатты…» деген айыппен қамауға алынған қала әкіміне бостандық берілуін талап етті.
Шерушілер билікке наразылықтарын білдіруде
Сингапурдың «www.zaobao.com.sg» сайтында жарияланған материалда ереуілшілердің Ердоған Үкіметінің жүргізіп жатқан саясатына қарсы наразылықтарын ашық айта бастағандығы айтылыпты.
«Біздің елде экономика, әділет, заң барлығы да құрдымға кетіп барады. Сондықтан біз осында жиналып жатырмыз. «Құқық, заң және әділдік» деп, өз құқығымызды талап етіп жатырмыз», – депті аты-жөнін атағысы келмеген қала тұрғыны.
Республикалық халықтық партияның бастапқы сайлауы өткен жексенбіде Экрем Имамоғлыны келесі президенттік сайлауға кандидат ретінде қолдау үшін алғашқы сайлау өткізді. Сайлау бастапқыда 2028 жылға жоспарланған болатын, алайда Республикалық халық партиясы «Үкімет легитимділігін жоғалтты» деп есептегендіктен, мерзімінен бұрын Президент сайлауын өткізуге үндеу жасап жатыр.
Ішкі істер министрі Али Йерликая осы аптада наразылықтар басталғаннан бері 1900-ге жуық адамның ұсталғанын және бейсенбідегі жағдай бойынша соттар олардың 260-ын қамауға алғанын айтты.
Имамоғлы ұсталған соң Түркияның қаржы нарығы құлдырап, орталық банк валютаны қолдау үшін резервтерді пайдалануға шешім қабылдаған. Қазір шерулердің жеке бизнеске де кері әсер ете бастағандығы айтылуда.
Бірақ түрік Үкіметі бұлардың барлығының уақытша болатындығын айтып жұртты сендіруге тырысуда. Орталық банк негізгі экономикалық серпінге зақым келмегенін, бірақ қажет болған жағдайда қосымша қадамдар жасайтынын мәлімдеді.
Қазір билік өкілдері Республикалық халық партиясын жаппай шерулерді ұйымдастырып, мемлекетте орнықсыздық тудыруға тырысып жатыр деп ашық айыптай бастады. Ал РХП- өкілдері болса билік саяси жоспарын жүзеге асырып жатыр деп отыр.
Имамоғлы Мармара түрмесінен жаңа жазба жариялады
19 наурызда тұтқындалған Республикалық халық партиясының (CHP) Ыстамбұл қалалық муниципалитетінің мэрі Экрем Имамоғлы дүйсенбіде өзінің X аккаунтынан хабарлама жариялады.
Мәтіннің кіріспесінде бір жыл бұрын жергілікті сайлауда жеңіске жеткеніне сілтеме жасаған Имамоғлы жалғасып жатқан саяси шиеленіске қатысты: «Халықтың таңдауын өзіне лайық болғанда ғана құрметтейтін «бір адам» бір жылда халықтың еркіне көбірек шабуыл жасады», – деді.
Уақытша қамау изоляторында отырған Ыстамбұл мэрі, РХП өкілдерінен бес аудан әкімінің қамауға алынғанын және екі муниципалитетке билікке сенімді адамдар тағайындалғанын еске салып: «Көптеген әріптестеріміз қамауға алынды. Ыстамбұл әкімі ретінде мен қамауға алындым. «Бір адам» мұны әдеттегідей әділетсіз, заңсыз операциялармен жүзеге асырды. Жасалған нәрсе – анық қылмыс, бұл – халықтың еркіне мән бермеу. Бұл – ұлттық ерік-жігерге қарсы жасалған төңкеріс. «Ыстамбұл заңсыздығы» – анық төңкеріс», – деді ол.
PS: Түркияда халықтық шерулер әлі басылмай тұр. Бұл ең алдымен экономикалық тұрақсыздыққа алып барады дейді сарапшылар. Наразылықтармен бірге тұтқындаулар мен қамауға алулар саны да артып келеді. Ішкі істер министрлігінің мәліметіне қарағанда, қазірге дейін 2000-ға жуық адам тұтқындалған. Қамауға алынғандардың арасында шетелдік журналистер де бар. Түркия билігі «олардың арасында Күрдстан жұмысшы партиясымен байланысы бар тұлғалардың болғанын» мәлімдеп отыр. Ал Президент Режеп Тайып Ердоған Анкарада Үкімет отырысынан кейін жасаған мәлімдемесінде наразылық акцияларын «зорлық әрекеті» деп атады.