Жақсы жар сынамайды, мінемейді, сенеді

Ер азамат — отбасының басшысы әрі қамқоршысы. Әйел адамдардың міндеттері болатыны секілді, ер адамдардың да отбасында атқарар өз жұмыстары бар. Ал жақсы жар қандай нәрселерді көңіл көзінен таса етеді. Олар:
1. Сынамайды. Жақсы күйеу әйел адамның қисық қабырғадан жаратылғанын біледі. Сондықтан да сынап, мінеумен оны сындыруға тырыспайды. Бір хадисте: «Әйел адам қисық қабырғадан жаратылған. Оны түзетемін десең сындырып аласың», — деген (Абу Һурайрадан Муслим риуаят еткен). Әйелді тек ақылмен, мейірімділікпен ғана тәрбиелеу керек. Кемшін тұстарын айтып, кемсіте бергеннен гөрі, жақсы жағын айтып, мақтап қойсаңыз, әйеліңіз сіз үшін жанын да аямайды.
2. Тексермейді. Сенімсіздік — ерлі зайыптылардың ортасындағы ең үлкен кедергі. Дініміз де бір-біріне сенуге, күмәнді, теріс ойлардан аулақ болуға шақырады. Сенім бар жерде өзара сүйіспеншілік те, тыныштық та арта түседі. Абу Һурайрадан Байхақи риуаят еткен хадисте: «Сендердің ең жақсыларың, әйеліне жақсы қарайтындарың» — делінген.
3. Әйеліне зат секілді қарамайды. Сіздің әйелге қалай қарайтыныңыз адамгершілік қасиетіңізді көрсетеді. Әйеліңіз — өмірлік серігіңіз, балаларыңыздың анасы. Дәл сіз секілді «тірі жан». Бірақ әлдеқайда нәзіктеу, әлсіздеу. Сондықтан жұмсақтық пен назар аударғанды жақсы көреді. Көбірек тілдесіп, сырласуға тырысыңыз. Көбірек көңіл бөліңіз. Көңіл-күйін, не мазалап жүргенін, нені қалайтынын сұраңыз. Осылайша сіз әйеліңізге сүйіспеншілігіңізді білдіріп, оны қуанта аласыз.
4. Кемсітпейді. Әйелге жекіп, кемсітіп не болмаса қорлауға болмайды. Қандай да бір қателік жасап қойса, ашуыңызды ақылға жеңдіре біліңіз. «Сен сияқты әйел кімге керек дейсің?» деген сияқты сөздермен кемсітіп, ар-намысын аяққа таптамаңыз. Жан жарыңыз ретінде, жеке тұлға ретінде сыйлай біліңіз. Тағы бір хадисте: «Жұбайларыңмен жақсы қарым-қатынаста болыңдар» — делінген («Нисә» сүресі, 19-аят).
5. Өзгелермен салыстырмайды. Күйеуі әйеліне: «Әне жұрттың әйелін қарашы, ал сенің жүрісің мынау» деп айтқан бір сөздің өзі әйелдің нәзік жанын жаралайды. Өз-өзіне деген сенімі жоғалып, іштей жеп тынады. Қайта оған көмектесуге тырысыңыз. Былай жасасаң тіпті керемет болар еді деген сыпайы сөздермен сізге ұнамаған тұстарын түзетуге тырысыңыз.
6. Әкелік парыздарын естен шығармайды. Бала тәрбиесінде әке мен ана бірдей рөл атқарады. Олардан өз махаббатыңызды аямаңыз. Балаларыңызбен жақсы қарым-қатынасыңыз әйеліңізге де қуаныш сыйлайды.
7. Ашуға берілмейді. Қанша ашуланып тұрсаңыз да ешқашан дауыс көтеріп айғайлап, ұрыспауға тырысыңыз, әсіресе балалардың көзінше. Алла сабырлыларды жақсы көретінін ұмытпаңыз. «…(ашу қысқанда өзін ашуландырған адамның сазайын беруге шамасы жете тұрып) ашуын жеңе білгендер һәм адамдарға кешірімді болғандар. Шүбәсіз, Алла (міне, осындай) ізгі жандарды жақсы көреді», — деген («Әли-Имран» сүресі, 134-аят).
8. Өтірік айтпайды. Өзіңізге де, өзгелерге де адал болыңыз. Дәл осы өтіріктен қаншама отбасы ажырасып кетіп жатыр. Бір хадисте: «Мұнафықтың (екіжүзділіктің) белгісі үшеу: уәдеде тұрмау, өтірік айту, аманатқа қиянат жасау», — деген. Өтірік айту — ең жаман қасиет. Сіз балаларыңызға үлгі екеніңізді естен шығармаңыз. Мейірімділік, түсіністік пен сүйіспеншілік — бақытты отбасы болудың бірден-бір кепілі.

Камшат Айдарханова