Жамбыл облысының 80 жылдығына автокөрме

Таразда тұңғыш рет реторо көліктер көрмесі өтті. Көне шаһардың көрікті орындарының бірі – «Жастар» аллеясында өткен шарада әр дәуірдің өкіліндей бір жерге жиналған түрлі маркадағы темір тұлпарлар тамашалауға келген тұрғындардың көзайымына айналды.

Көрмеге бүгінде шаммен іздеп таппайтын «ГАЗ-67» машинасынан бастап, соңғы үлгідегі темір тұлпарларға дейін қойылған. Қала тұрғындары мен қонақтарына бұл қызықты «Джип клуб Тараз» тобы ұйымдастырды.

Көрмеге халық өте көп жиналды. Тараз қаласының тұрғындары мен қонақтары үшін бұл бір керемет демалыс болды деуге де негіз бар. Жалпы, шараға қаладағы ең әдемі деген 50-ге жуық автокөлік және 10 шақты мотоцикл таңдалынып алыныпты. Маркасы жағынан бірінен-бірі оза шапқан темір тұлпарлар көздің жауып алып, көпті өзіне тәнті етті. Көрмеге келушілер өздеріне ұнаған көліктің жанында фотоға түсіп, қызықтап жатты.

«Жастар» жылы мен Жамбыл облысының 80 жылдығына орайластырып өткізілген автокөліктер көрмесін енді жыл сайын өткізу жоспарланып отыр.