«Жетібай-Жаңаөзен» автожолы қайта жаңартылады

Елбасы Нұрсұлтан Әбішұлы Назарбаев елімізде транспорттық-логистикалық инфрақұрылымды дамыту, жұмыс орындарын құру  және бизнеске мемлекет тарапынан айрықша қолдау көрсету «Нұрлы жол» бағдарламасының міндеттеріне кіретінін айтқан еді. Қазіргі таңда аталған бағдарлама аясында облыста ауқымды жобалар жүзеге асырылып жатыр.

Бүгін аймақ басшысы Ералы Тоғжанов «Жетібай-Жаңаөзен» автожолын қайта жаңарту жұмысына қатысты. Жолдың ұзындығы 73 шақырымды құрайды. Жалпы құны 25 млрд.теңгені құрайтын жобаға Азия Даму Банкісі қаражат бөлуде.

«Бүгін Жалпыұлттық көпір аясында үлкен кәсіпорындар іске қосылды. Қазақстан бойынша 25 үлкен жобаның ішінде өздеріңіз куә болғандай, «Шетпе-Жетібай-Ақтау» жолы  бүгін Елбасыға тапсырылды. Сондықтан осы нысанның жүзеге асырылуына атсалысқан барлық азаматтарға алғысымды айтамын. Міне, қазір сол ірі жобаның жалғасы ретінде Жетібай мен Жаңаөзеннің арасындағы жолдың бастамасын бастағалы тұрмыз. Бұл жәй ғана бастама емес, бұл алдымен адамдардың қауіпсіздігі. Қазір  Ақтау мен Жетібай, Жетібай мен Шетпе арасындағы автожолда жол апаты бірнеше пайызға дейін төмендеген. Яғни, жолдың сапасы халықтың өмірін қамтамасыз етумен тікелей байланысты. Екіншіден, жолдың бойында кәсіпкерлер кәсібін жүргізе алады. Үшіншіден, қаншама азамат жұмыспен қамтылды. Мына құрылыс жұмыстарына 600 адам тартылды.  Қазақстанның тарихында алғаш рет Батыс Қытай мен Батыс Еуропа арасын жалғастыруға мүмкіндік туды. Соның жолы ашылды. Елбасының үлкен бастамасының алғашқы сатысы жүзеге асты. Қазақстан — Еуразиялық көліктік-логистикалық хабқа айналатын күн алыс емес қой деп ойлаймын»,- деді Ералы Тоғжанов.

Айта кетейік, 1-учаске бойынша жолдың 35 шақырымына дейін жөндеу жұмыстарын  «Ақ жол құрылыс» ЖШС мен «Аккорд» АҚ жүргізеді, ал әрі қарай 2-учаске бойынша 73 шақырымға дейін «Дженгиз Иншаат» АФ АҚ жұмыс жасайды.

Маңғыстау облысы әкімінің баспасөз қызметі